Bloodtale: khoon se likhi kahani jo aap kabhi nahi bhool payenge

Raat ke andhere mein jab hawayein bhi chup ho jaati hain, tab kuch kahaniyan zinda ho jaati hain. Ye kahani unhi mein se ek hai — ek aisi kahani jise "Bloodtale" kehte hain. Uttarakhand ke ek chhote se gaon "Chhanpur" mein ek viran haveli thi. Khaas baat ye thi ki us haveli mein koi 50 saal se nahi gaya tha. Log kehte the ki wahan koi rehta nahi, lekin raat ke andhere mein jalti roshniyaan aur gungunaati awaazen us baat ko jhutlati thi. Haveli ke baare mein kai afwaayein thi. Kehte the ki 1972 mein ek zameendaar "Devendra Rana" ne apni biwi aur do bachchon ko usi haveli mein zinda jala diya tha. Wajah? Unki biwi par kisi tantrik se sambandh hone ka shak. Haveli tab se band thi, lekin har teesri raat ek ajeeb roshni chhup kar niklti thi wahan se. 2023 mein, journalist Anvi Singh ne Bloodtale ke bare mein ek blog padha. Curious aur daring hone ki wajah se usne faisla kiya ki woh Chhanpur jaakar khud jaanch karegi. Chhanpur pahuchte hi logon ne usse warn kiya. "Biti raaton ka sach jeevit logon ko nahi pata hona chahiye," ek vriddh ne kaha. Lekin Anvi kisi ki baat sunne wali nahi thi. Usne camera, torch, aur ek drone ke saath haveli mein kadam rakha. Darwaza chhota sa dhakka lagate hi khul gaya. Jaise kisi ne usse andar bulaya ho. Andar ghuste hi, ek thandi hawa ka jhonka uske gaalon ko chhoo gaya. Ajeeb baat thi — itni purani jagah, lekin koi dhool nahi. Deewar par khoon ke haath ke nishaan bane the. Woh nishaan abhi abhi bane lag rahe the. Gile the. Anvi ne unhe chhoo kar dekha, unka rang gehra laal tha. Jaise naya khoon ho. Peeche se kisi ke chalne ki awaz aayi. Mud kar dekha — koi nahi tha. Phir usne ek kamre ka darwaza khola. Andar ek chhoti ladki ki tasveer lagi thi — "Anaya" naam likha tha neeche. Tasveer ke saamne ek aaina tha. Jab Anvi ne usmein dekha, to uske peeche ek aurat khadi thi. Ghoonghat mein, safed saari mein. Aankhon se lahu beh raha tha. Anvi ne turant mud kar dekha — koi nahi. Uska camera khud ba khud on ho gaya. Record karne laga. Drone ne udaan bhari, lekin chhat se takra ke gir gaya. Video mein jab Anvi ne baad mein dekha, to drone ki aankh ne record kiya tha ek parivaar ko — aag mein jalte hue, lekin cheekhte nahi. Aankhen unki seedha camera mein thi, jaise woh zinda hon. Anvi ko usse library mein ek purani diary mili. Usmein likha tha: "Agar koi is kahani ko padhta hai, to yaad rahe: har likha lafz kisi ki maut likhta hai." Anvi diary ko padhti gayi. Har panna jaise uske dimaag mein chhapas gaya. Phir usne dekha — uske haath pe nakshe ban gaye the, jaise kisi ne chakoo se kaata ho. Tabhi ek awaz aayi — "Tu ab humari kahani ban gayi hai." Haveli ka darwaza band ho gaya. Lock ki awaz hui. Andar ek dum ghutan bhari. Uske baalon mein kisi ne ungli ghumayi. Uski gardan pe kisi ne foonk maari. Ek darpan toot gaya. Har sheesha mein ek aurat ki shakl thi — lekin woh Anvi nahi thi. Vo shakl cheekh rahi thi. Uska gala kaata hua tha. Lekin uski aankhen zinda thi. Diary ke aakhri panne mein likha tha: "Bloodtale wo kahani hai jahan antim panne likhne wala kabhi bacha nahi." Anvi ne bhaagne ki koshish ki. Har darwaza uske muh pe band hota gaya. Har rasta andhere mein doobta gaya. Raat ke 3 baje, usne phone se last message bhejna chaha. Signal nahi tha. Usne video recording chalu ki aur bola: "Yeh sach hai. Bloodtale ek kahani nahi, ek pareshani hai. Agar yeh video mila, to samajhna main mar chuki hoon." Uske baad camera band ho gaya. Agle din logon ne haveli se ek phone ki awaz suni. Aur logon ne foran Police ko bola liya, lekin police ko kuch nahi mila — sirf ek diary aur ek mirror, jismein Anvi ki aankhen dikh rahi thi — aur woh blink kar rahi thi. Aaj bhi jab koi us haveli ke paas se guzarta hai, to ek ladki ki awaz aati hai: "Bloodtale ab tumhari bhi hai." Part 2 is coming soon"